Kelionenn

Pell zo n'em boa ket embannet amañ ur bajennad krennlavarioù... graet eo hiniv, atav er memes rummad.
An ton àr-dreñv zo me get ma gitar.

vertuzioù 98-120.mp3

Setu neuze re nevez, atav er vertuzioù; ar pezh a zo àr-dreñv a zo bet enrollet e Pleskob, get an trio Pasquet Barou Guichen hag en doa lakaet begon spontus en dañserion an noz-se... evit bout un tañva ag ar son em eus lakaet un tamm ag an dañs (Rond de Saint Vincent) en e unan.

Vertuzioù 76-97.mp3

an ton-se èl ma oa (hep komzoù arabadus ha fur dirak)

tamm ag an dañs.mp3

Ar vertuzioù c'hoazh... ma, àr ar bajenn-mañ eh eus traoù a denn da Zoue pe d'an Iliz, mes èl ma 'm eus lâret deoc'h c'hoazh, o lâret a rin tout, ha c'hwi a zibabo en o mesk goude !

An ton àr-dreñv a zo e-mesk ar re a blij ar muiañ din; e pladenn Frédéric Guichen "La lune noire" e c'hellit kavout hennezh; un ton anvet "Trad irlandais" eo, un ton a vro Iwerzhon eo evel mand eo skrivet; gitar e vreur Jean-Charles a glevomp ivez, hag ar gitarour-boud meur Stéphane de Vito. Ha neuze piv a glever é ober ur solo gitar tredan ? Jacques Pellen.

Vertuieu 56 - 75.mp3

Touenn, krog on da soñjal e vehe aesoc'h ar pennadoù da gavout ma ne vehe ket àr ur blog met àr ur lec'hienn internet. Ma vehe aes tremen ag an eil d'egile e rahen, kredapl.

Da c'hortoz, tañvait krennlavarioù nevez, ar re-mañ zo bet lakaet àr un ton mil-anavezet (afe, pas c'hoazh) get ar strollad Fast Noise Trade. Ya, gouiet a ran, seblant a ra an ton dont àr-eeun a baradoz ar sonerezh, met taolit meiz d'ar c'hrennlavarioù ivez ur seurt !!

Vertuieu 35 - 55.mp3

Setu enta eil lodenn ar Vertuzioù; ar sonerezh ar wezh-mañ zo un digarez da ziskouez deoc'h ur sonenn e-mesk ar re a blij din ar muiañ get Led Zeppelin: Dazed and Confused, na bout n'eo ket bet ijinet gete a gentañ, kempennet ha "tredanaet" hepken. Evel rezon e vo klevet skañv, ha pas betek ar fin, evit bravaat ar c'homzoù...

Vertuieu 14-34.mp3

Setu ar re nevez, tem ar labour atav. Lakaet em eus da ditl "Ar Labour" er skritur a-vremañ ha pas "Er Labour" èl ma oa skrivet rak gouiet a ran e vo lakaet diaes tud zo ha n'int ket kustumet doc'h ar skritur gozh.

Ar wezh-mañ e vo klevet àr-dreñv sonioù ag an Arabi Saoudit, get Abdul Majeed Abdullah (Arabia Seoudit) ; ar sonenn zo "Abki Ala Majaraly". Brudet eo hennezh du-hont, hervez.

Proverbes Er Labour 71 - 86.mp3

Setu enta ur steudad krennlavarioù arall, àr dem ar labour, get sonioù ekzotek ar strollad Fast Noise Trade àr-dreñv... setu amañ sonerezh a-c'hoal !

Proverbes Er Labour 52 - 70.mp3

Degas a ran soñj deoc'h eo tennet an traoù-se ag ar levr: "Oeuvres de Pierre Le Goff", embannet get Skol Uhel ar Vro. N'eo ket eñ en deus int skrivet avat; o dastum ne lâran ket.

Setu enta un aridennad arall, atav àr dem ar labour; ar wezh-mañ eo àr un ton a Celtas Cortos, un ton, pa selaouer mat, hag a zo d'am soñj ar gwellañ Rond de Saint-Vincent bet sonet betek bremañ...

Proverbes Er Labour 34 - 51.mp3

Evel just, amañ àr dem ar labour pe c'hoazh muioc'h àr demoù arall zo, deoc'h-c'hwi eo da choaz goude pere ho peus c'hoant implij. O lâret a ran tout, na bout eh eus en o mesk lod get soñjoù kozh pe kamm un disterañ àrdrañv. Lod(-kaer) o deus un dalvoudegezh evit ar vuhez a-vremañ, lod arall zo kentoc'h evit implijoù arall (farsal, derc'hel soñj a dra pe dra, ha me oar me)... met deoc'h c'hwi da choaz goude !

Un dra zo gwir: kavout a reer lies e proverboù ur bobl bennak re hag a lâr ar c'hontrel unan d'an all, ha kement-se zo yac'h, d'am soñj. Gellout a rit implij an eil pe egile doc'h an dober. Pe memes implij ar memes hani, ur wezh evit lâret un dra, ar wezh arall evit lâret un dra disheñvel a-grenn !

Setu neuze an eil tamm;
an ton a glever àr-dreñv a zo "Evelkent evelkent" get Ar Re Yaouank.

Proverbes Er Labour 17-33.mp3

Setu en em lañsan hiniv en un dra hag a vago ivez mam blog, plaen... skoet ar soñj e ma fenn, an neizhour, da enrolliñ krennlavarioù a ma c'hornad evit ma vehent anavetoc'h get an dud. Nag ur binvidigezh ur seurt enne, ret eo anzav. Lod anezhe zo diamzeret avat, met pas kalz e gwirionez; dreist-holl ar re a denn d'ar merc'hed; ar re a denn d'ar labour, da skouer, na bout ne gasont ket an dud da c'hoarzhet pe da farsal, a zo liv ar wirionez àrne ur sort. Marse e vehe moaien sevel un noziad er vro un deiz bennak lec'h ma vo ar c'hrennlavarioù danvez, ha digarez, da c'hoari. An nep a lâro ar muiañ anezhe er gomz a c'hounezo ! Met n'omp ket c'hoazh amañ.
Lenn a rin neuze, tamm ha tamm, pajennadoù a levr Pier ar Go, hag a dolp krennlavarioù pe lârennoù bet serret dezhoñ e bro Gwened Uhel.
Pendeogwir e oa un tamm sec'h ha kentelius betek re o enrolliñ a capella, em eus soñjet lakaat ur sonenn àr-dreñv; rock-and-roll lakaomp ! Met klask a rin chañj ar stiloù, memes ma vo pasapl a Led Zeppelin pe Ar Re Yaouank. Petra a faot deoc'h ! Ar son avat n'eo ket gwall bropr. Marse en amzer da zonet e vo moaien gwellaat an dra-se ?
Met grait fonnapl evit profitiñ hag evit deskiñ lod ag ar c'hrennlavarioù. Lod-kaer a chomo gwir, met an tu d'o c'hlevet marse ne chomo ket. Un deiz bennak pa ne vo ket mui a urzhiataerezh e vo mat bout tennet akuit anezhe evit deskiñ furnez ar bobl !

Setu enta ar lodenn gentañ !

Proverbes Er labour 1-16.mp3

Ar levr: Oeuvres de Pierre Le Goff, embannet get Institut Culturel de Bretagne / Skol Uhel ar Vro

An ton: "Four Sticks", Led Zeppelin

Estroc'h evit traoù dastumet get Pier er Go e klaskin lakaat ivez traoù dastumet genin.