Kelionenn

E tan en-dro a welet "louzaou ar gwazhiad ruz", hag ar wezh tremenet em boa skrivet penaos ne ouien ket etre "Rumex sanguineus" ha "Rumex conglomeratus" peseurt hani choaz. Hama, bremañ on sur, "Rumex sanguineus" eo, hag a-benn ar fin e kouch mat doc'h an anv brezhoneg. An hani arall a-benn ar fin, ne ouian ket ma vez gwelet nervennoù ruz doc'hti èl-se...
Penaos em eus gouiet ? Gwelet em eus barroù sec'h, frouezh doc'hte. Ha doc'h ar frouezh e oa bep a voull vihan (granig / granule e galleg). Tri c'hostez zo da bep frouezhenn, ha n'eus ket nemet unan hag a zoug ur granig.
Er spesad arall, avat, eh eus tri granig, unan doc'h pep kostez...
Kontant on bout gouiet. Ne lârehen ket e sailhan get ar joa met brav eo donet da benn a ouiet seurt traoù, get sikour frouezh munut. Hag èl-se e ouiin gwell o diforc'h ar wezh-mañ 'za.
Soñjal a ran un tamm: en despet ma vez plijus d'ar liesañ em deurel da studi an natur, traoù kaer a vez gwelet lies, ne vez ket atav stag ar blijadur doc'h an traoù-se... Seul vuiañ ma anavit a spesadoù, seul vuiañ e voc'h trist mard eus unan anezhe é vonet da get. Get ar yezhoù emañ ur seurt. Pa zeskit yezhoù "bihan" e voc'h muioc'h e riskl a vout gwasket get o flanedenn. Ha memes tra c'hoazh get ar gerioù e diabarzh ur yezh ! Pa ouiit brasted un trezol e vezit teneroc'h goude pa ya traoù zo àr vihannaat. Evit kement tra zo eo gwir an dra-se, gwir eo...

Setu frouezh "Rumex sanguineus", tostik-tra èl m'o gweler an deizioù-mañ:

(ur voullig hepken doc'h pep frouezhenn; e gwirionez ar voullig-se n'eo ket un hadenn, mes just evit gober brav !!)

rumex sanguineus.jpg

Evit achu ma fennad hiniv eh an da reiñ deoc'h ur foto bennak ag ar gouelani bet gwelet disadorn, bet tapet get ar fotografour e oan en em gavet getoñ er porzh:

goeland-blanc-1945.jpg

goeland-blanc-1962.jpg



Evel ma welit n'eus ket tamm du ebet doc'h pennoù an divaskell èl m'o deus "ar gouelani-ni"

Un droiad e porzh-pesketa an Oriant. Gouelani a bep tu, ha plijadur é sellet doc'hte. Hag un tamm goulenn oc'hpenn; goude un taol avelaj èl ma zo bet an deizioù paset, hervez, e vez muioc'h a chañsoù da welet er porzhioù evned hag a vez gwelet da gustum en donvor hepken, peotramant evned é tonet a bell vro, hag a vehe bet kaset get an avel kreñv. Ar wezh-mañ em eus bet chañs, touenn, rak un evn seurt-se am eus bet ar blijadur da sellet, a dost. Unan yaouank ag ar spesad Larus glaucoides eo, da lâret eo "goéland à ailes blanches" e galleg pe "gouelan arc'hlas" e brezhoneg (afe, ar wezh-mañ n'eo ket gwall sklaer: perak "arc'hlas" ? "arwenn" a vehe bet marse gwell). Emañ àr ar c'hae, difiñv. Sellet a ran doc'htoñ, doc'h ma levr... mes ya ! eñ a-walc'h eo ! N'eus ket tamm du ebet d'an divaskell. E liv zo kalz sklaeroc'h a-du-rall, e-tal kani ar gouelani yaouank a anavoomp (gouelan kein-du, gouelan gris, gouelan bras); un tamm "kafe dre laezh" èl ma lâr ar levrioù. Gortoz a ran ma vo é nijal, met e-pad mand on é sellet doc'h ma levr e ya kuit hep din gwelet tra ebet. Dre voneür e mañ arre en e blas ur c'hardeur goude pa dremenan en-dro.
Eya, ur gouelan ag ar broioù yen eo, hag a vez gwelet ur wezh an amzer dre amañ !
Me 'lâr deoc'h on kontant bout gwelet ur loen èl-se !

Ur gouelan arc'hlas yaouank, àr ur c'hae, apeupre er feson ma 'm eus gwelet unan tuchant.
Ur wezh daet da vout bras int hogozik gwenn-kann.