Kelionenn

krogomp get an natur, kar an notenn-mañ zo sañset bout er rummad "Notennoù natur" alkent.

Er prantad-mañ e kresk ar barroù nevez er fav. Hag ar pezh zo souezhus gete, o barroù hag o del a arru en un taol, ne lakaont ket kalz a amzer d'en em zisplegiñ ha da lediñ an disheol er c'hoad a-bezh. Hag a-hed an hentoù e weler enta ar c'hoadoù é tonet da vout glas-sklaer (lec'h ma kaver fav d'ar bihannañ). Pa vez komparajet get ar gwez derv (ma ta an del anezhe er-maez koursikoc'h) e weler e lak muioc'h a amzer o barroù da arru, hag o del da 'n em zisplegiñ ha da arru en o ment. Ma, tostaat a ra (a-herr) termen ar barroù-mae...

Kas a ran kemenn deoc'h em eus enrollet an abadenn radio a vo klevet àr RMS (89.6 .... kornad an Alre) a-benn dimerc'her (7e 8e) hag (ar memes hani) d'ar sadorn goude (2e 3e); ha tout se adskignet ar sizhun goude... Er programm, un tamm rubrikenn natur, un istoer, un tamm lennadenn, un tamm rubrikenn yezh. Ne lâran ket eo a-dres ar pezh a zo a-barzh, met plijadur am eus bet é varbotal er post, hag esperañs am eus ho po plijadur ivez é klevet brezhoneg er post hag é teskiñ traoù - piv oar ?

Perak e komzan a Clint Eastwood amañ ? Hama, an neizhour eh on bet é welet e film nevez. Ha tamm keuz ebet n'em eus bet, e gwirionez. Ne ouien ket re pesort film e vehe bet, ha... bourret em eus. N'em eus ket c'hoant lâret deoc'h muioc'h evit leuskel goust an dizoleiñ geneoc'h, lâret an an dra-se just evit displeg deoc'h, ma ne ouiit ket pesort film monet da welet, get hennezh d'ar bihannañ, n'ho po ket ar santimant bout kollet ho amzer.

Ma, klozomp amañ.

Moaien a vo deoc'h klevet ma mouezh arre àr RMS (an Alre, 89.6) get ma abadenn e brezhoneg "Filaj Global"; ar wezh-mañ c'hoazh e oan e ma unan é tiviz a-ziàr an natur, ur levr bennak, lennet em eus traoù, komzet ag ar menezioù-tan... Stank e oa, na bout e oa un tamm sonerezh ur wezh an amzer (strollad Guichen)... esperañs am eus n'em bo ket besteodet re aze.
Atav e vo moaien deoc'h klevet an dra-se dimerc'her kentañ etre 7 eur hag 8 eur d'an noz, hag adskignet e vo d'ar sadorn àrlerc'h etre 2 eur ha teir eur d'enderv.

Blogiñ zo mat, met komz a zo tad !

Setu marse petra zo kaoz e krogan en-dro get ma abadenn Filaj Global àr RMS, un abadenn e brezhoneg a vo bremañ skignet d'ar c'hentañ ha trede merc'her ag ar miz etre 7 eur hag 8 eur da noz (evel e-raok), hag adskignet ma 'm eus soñj mat ar sadorn da heul pep abadenn, etre 2 eur ha 3 eur d'enderv.
Enni e vo komzet evel e-raok ag an natur, evel e-raok e vo moaien dizoleiñ pinvidigezh ar c'heriaoueg, sonerezh vo a-barzh; klask a rin ivez gober muioc'h a draoù a c'hell interesiñ ar vugale, evel ur rubrikenn dizoleiñ ar bed.
Tout an traoù-se e brezhoneg. D'am soñj emañ posupl selaou doc'h an dra-se dre internet àr lec'hienn ar radio:

http://radiomorbihansud.fr/site/index.html

... met n'on ket c'hoazh daet da benn. A-du-rall e bro an Alre eo 89.6 ar frekañs.

Pezh zo n'eus ket nemet an abadenn-mañ e brezhoneg àr RMS... klevet e vez ma mouezh àr RBG (Radio Bro Gwened) ivez, er rubrikenn natur.

Er radio-se eh eus muioc'h a vrezhoneg, avat, hag ur labour mil a-bouez a raont... Met RMS a vehe kontant da zegemer un abadenn arall e brezhoneg, neuze ma faot deoc'h kemer ho lañs ha krogiñ da gomz brezhoneg er radio, krogit a-barzh !!